Profilo autori

So' Peppina Raniere e faccio 'nu mestiere, 
viecchio comm'ô munno, ca però me fa' campa'.
Nunn'è chisto 'o nomme mjo, j' mme chiammo Maria,
'nun saccio fa' miracule, ma ce pozzo sempe pruva'.
M'aggio scegliuto 'stu nomme pecchè so' troppa bbona. 

Dongo cocche llezione a chi se vò spassa'.
So' 'na pupata e zucchero e tengo ll'anema doce:
si vuò te metto 'ncroce, ma senza te 'nchiuva'.
So' nu murzillo 'e femmena e maje nisciuno s'è lagnato:
Chello c'aveva da', j' ll'aggio sempe dato.

Comme dicite? Chi me lo fa fare?
Tengo tanta cumpare, che me sanno piglia'!
Je 'e ddongo 'nu sustegno e lloro pe n'impegno, 
me fanno leva' sfizie ca me fanno mangia'.
È 'nu mestiere antico e sapite che vve dico:

"Venite areto 'o vico ca ve faccio arricria'."
Ma che tenite 'a dicere. Nun venno birre e cicere!
Fatico pe mme sape da' 'nu poco 'e dignita'.
Nunn'avite bisogno e mettere a ffuoco a fantasia, 
p'anduvina' quanta delizia ve da' 'sta mercanzia.

E po' je so' famosa e ognuno mme cunosce:
j' 'a ggente nun ll'ammoscie. Mme saccio cumpurta'.
Nun so' 'na munacella: j' so' friccicarella. 
Nun songo tanta bella, ma saccio fa' spassa'.
'O tiempo pero' è carogna e 'a miccia s'è studata.

Nun riesce a da' cchiù chella bella fiammata.
Accussì Peppina Ranieri, ha fernuto e fa' 'o mestiere e 
s'arricorda d'ajere ca steve llà a pazzia'.
Tene ancora e tre cumpare, ca' senza s'aspetta' niente, 
nun so' core pezziente e 'a vanno a cunsula'.