Profilo autori

'O sole 'e matina, quanno è 'nna bbella jurnata, 
se mette fucuso mmiezo 'e mmuntagne affacciato. 
Lloro 'nun dicene niente. 'O fanno sta' appujato

isso se nn'apprufitta, s'allarga e fa 'o scrianzato. 
Cù lentezza pecchè 'nun tene pressa, nasce ll' aurora. 
'O sole 'a và pittanno cu 'nu pucurillo 'e chiarore. 

Po' quanno saglje 'ncoppa 'o carro e s'assetta adderete, 
se fa traina' a ciento cavalle e và appiccianno 'o pianeta. 
Parla 'na lengua muta cu arbere, aucielle e pine. 

So' chiacchjere fatte 'e segne cu animale e farfalline. 
È 'nu linguaggio facile, ca 'nun s'adda 'mpara'. 
È 'nu munno fatto 'e geste, addò e mute ponno parla'. 

Po' 'nu lenzuolo giallo, schjarisce lentamente 'o prato. 
So' ciure ca se movene lente, pecché mò se so' scetate. 
Se fanno cocche chiacchiera leggiera e mattutina, 

'ntanto se bbevene latte 'nzuccurate 'e bbrina. 
Chesto succede tutte 'e juorne quanno se sceta 'o sole. 
Isso scarfa 'a natura e essa pe rispetto spanne addore.