Profilo autori

Dint'a terra vullente, d'ê respire se nne sente 'a voce. 
Quanta ciate affannate sott'ê pprete, s'abbraccene 'a croce. 

Mmiezo 'e pprete, 'ncopp'ê pprete, attuorno 'e pprete. 
T'aggire, t'avuote e vide sulo prete.

'Nun songhe prete ca vutte dint'a ll'acqua pe paria', 
sò masse 'ncarugnute ca 'nun provene pietà. 

So' pprete feroce ca 'nun tenene cuscienza: 
'nun guardene addò cogliene e 'nun te danno aurienza. 

Offennene, se scagliene, facenne povere e ammuina.
Ciacchene, accidene pecchè songo assassine. 

So' pprete ca chiovene 'a cielo senza manco guarda'. 
'Nun so' pprete ca se 'nfochene pecchè vonno scarfa'. 

So' masse senza scuorno, ca correne, fujene, minaccene:
'nun tenene 'o curaggio manco 'e te guarda' 'nfaccia. 

'Sti pprete toste, fredde, gelate e cu 'nu core 'e preta, 
cogliene, culpiscene e te pugnalene addereto. 

Nun so' bbone, ma te 'mpauriscene facenne rummore:
nun tenene n'anema, nè 'nu pucurillo 'e core. 

Allucca 'sta terra, ca mentre volle te lassa 'o scuro,
comme surece atterra animale, uommene e ccriature.

Ma mmiezo 'e pprete, 'nu filo d'evera se 'nfizza preputente. 
È 'a vita ca cumbatte, se difenne: nun s'arrenne...