Profilo autori

'Stu ffuoco c'arde 'ncopp'a bbrace, 
'mme rammenta fatte già passate.

Quanno cucenneme senza pruva' sullievo,
muntagne scanusciute 'mme saglieve.

Abbruciata peggio 'e 'nu tizzone,
me nne jevo strujenneme 'e passione.

Ardenne e nun sapenno chiù che fà,
cantavo spisso 'sta canzona ccà.

"Fuoco ca mm'appicce quanno passe, 
'mme strapazze, arde e 'mme cunfuorte.

Saglieme vullente dint' 'e vvene 
e traseme preputente dinto a ll' uocchie.

C''a faccia rossa e emozionata, 
rerenne sempe, già stongo sturdita.

Tu fiamma ca saje ardere brillante, 
'nfuochete e famme schiuppa' 'e vita.

No, 'nun te studà, saglieme 'ncoppa. 
Cuoceme aspettanne ca mm'appiccio.

'Nun dicere ca chistu bene gruosso, 
te pare sulamente 'nu capriccio.

Te vaje spassanno p''e ccampagne 
e curre adderete 'o viento ca te votta.

Forte e preputente spiezze 'e giunche, 
'mme 'mbriache e spiezze 'o ffierro dint' 'a votta.

'A vocca s'è 'ncantata e cant'ammore
addeventata strumento sona forte.

'Mme scopre appassiunata e sentimento
E 'o core 'mpazzuto scassa 'e pporte.

'E vvene pulsano sanghe e ppure tu, 
fuoco dirumpente sempe e cchiù.

Passiona 'nsanguinata ca nun mente, 
ca 'a vvote se fa blu e maje trasparente,

avveluppeme, atturcigliate cu mme,
nunn' haje bisogno e addimanà 'o pecchè.

Vino e fuoco russo site eguale. 
Assaje v'assumigliate pe calmà.

'O core pompa sanghe e và 'rruranno,
'a pelle e tutte ll'organe vicine. 

S'arraqquene 'ntanto ca mme' tuocche 
e je mme scarfo cu tte sempe vicino.

'E te me nn'aggia fà 'na panza chiena. 
Te voglio sentì cocere 'nsistente.

Mm'abbasta ca te sento e ca mm' affianche, 
pecchè senza 'stu ffuoco nun sò niente.