Profilo autori

'E panne spase 'e Napule so' 'na bella verità.
Stanno llà appise e se sanno fa guarda'.
Panne stise ô sole e ca addorene 'e pulito, 
mentre se 'mprufumma 'o naso cu 'nu piglio ardito. 

Panne pettegole ca se mettene a 'nciucia'.
Panne ca sapene 'e mare e se vonno 'mpiccia'.
Panne arraggiuse, curiuse e 'ncazzuse, 
ca sciosciene forte quanno 'o mare è nervuso.

'Sti fantasme stise ca facennese asciutta' d'ô viento, 
se contene parlanne gioie, vite e turmiente;
so' tanta storie spase e cchiacchiere 'e pariente, 
so' vvoce ca quanno appizze 'a recchia 'e ssiente.

so' lenzole ca' te contene 'e 'na notta 'e passione.
panne piccerille ca te danno 'n emozziona.
Sarranno sulo panne, però sanno parlà.
Tutte 'e juorne se stenne 'o ppoco e 'ntimità.

Cuperte stracciate e currede arricamate.
Merlette, nastre, pezze e vrenzole arrepezzate.
No, 'nun so' panne stise ma foglie e carta appise, 
addo' senza sapè ognuno dice e parla e se.

So' tanta menestrelle ca te vonno canta' storie, 
te contene asciuttannese, miserie o fatte 'e gloria.
Chiste so' 'e panne e Napule ca pure senza di', 
asciuttannese s'avvantane e se sanno fa capi'.