Profilo autori

'Na vota a Napule, ce stevene 'e balcune, 
addò ogni casa appenneva coccosa.
Accussì succedeva ca 'na pianta 'e vasenicola 
accumpareva pe scagno, mmiezo a 'na fronna 'e rosa.
Nunn'erene balcune, ma parevane puteche. 
Si 'nserro ll'uocchie, pare c' ancora 'e vveco.
'A riggina d'â casa, mentre appriparava 'o rraù,
se pigliava coccosa p' arricchi' 'o menù.
Mellune, sasicce e ogni bbene e Ddio, 
figuravene fore 'e balcune, c' affacciavano p'â via.
Pure mò tenimmo ' o balcunciello, 
ma nunn'è chillo 'e 'na vota,
pure si pare assaje cchiù bello.
Mò 'e balcune so' 'e lusso, songo elegante. 
Se so' trasfurmate in anonime verande.
Nun se sente 'o prufummo d'ê mellune e d'ê presutte 
e nun ce puo' truva', si vuò nu poco 'e tutto.
'A ggente passanne, nun po' cchiù guarda', 
chella bella culata e rrobba 'a mangia'. 
Ma che vulite a me. Forse nun sò signora, 
ma quanto me piacesse sentere ancora chill'addore!...