Profilo autori

Napule nascette pe n'ommo ca 'mpazzette. 
Ve parlo e 'nu pittore ca pe spasso e follia, 
'nu ghiuorno decidette e fa' na' pazzaria. 
"Don Gaeta'. Ma che facite?" Curiuso addimannaje.” 
"Don Genna' tengo che fa'. E' nu' fatto gruosso assaje.”
“Je voglio fa' 'na cosa c''a gente aggia stupi' 
'o munno adda parla', j' voglio sbalurdi'.”
"Overo? che dicite. Ma nun facite guaje. 
"A vertà j' stesso, 'o scunsigliaje". 
Ma isso capa tosta, ahimè se 'ntestardette. 
'O quadro accumminciaie e cunsiglie nun vulette. 
Cu 'na tinta blu e fra ciente tubette, 
comme niente fosse, 'o mare dipingette. 
"Me serve atu cceleste, nun tengo chiù culore. 
Me putite aiuta? v''o chiedo pe favore". 
"Don Gaetano bello. J' v''a desse 'na mana. 
Ma addò ll'aggia piglia'. Diciteme. E' luntano?
Ll'artista frasturnato e assaje sfastediato, dicette:
" Va buo', mo vengo" e sparette 'nquartato. 
C'aveva cumbinato chillu miezo squilibrato.
S'era arrubbato 'o celeste 'e ll'uocchie 
d''e figliole addormentate! 
'A tela 'mpuvvisamente azzurra se facette 
fuje accussi', c''a Napule, 'o cielo accumparette. 
"Ma ll'avite fernuto?" Curiuso addimannaje 
Nun me rispunnette e manco mme guardaje. 
"Che state facenno. Pecchè mo zumpettiate?" 
“Sto' arrubbanne argiento d''e sscelle d''e ffate."
Tutto ll'argiento ncoppa a ll'acqua s'appusaje. 
'O mare cu 'e brillante accussi' se 'lluminaje. 
e fatelle ferite e addulurate chiagnevano 
spargendo 'ncopp''a terra mille gocce dorate. 
Chesta pioggia jonna pe terra s'appusaje, 
na miniera d'oro 'a sabbia addeventaje. 
Vedenne 'na cummara, affacciata 'a nu balcone. 
Don Gaetano apprufuttaje e nun perdette ll'occasione. 
Nu cunto se facette, murmulianne fra se e se: 
"Je mmo ce provo: Veco si 'e ppozzo ave'" 
"Donna Rituccia cara. Dinto a stu panaro. 
Mettite 'o seno vuosto, ve prego. E' pe n'affare.”
"Nun ve ll'avesse chiesto. Ma vuie mme provocate. 
E mmo ve ll'aggia di'. Perdunateme, abbondate." 
"Carissimo Gaetano. Vuje me lusingate. 
E certo ca v''o dongo!" " Donna Ritu' acalate." 
Po' chella pasta morbida c''o marrone ammischiaje. 
"Don Genna'. Chisto è 'o Vesuvio." Je me' meravigliaje. 
Nun saccio si svenette, restanne senza ciato.
Però nu fatto è certo. Je stevo stupetiato. 
Quanta scugnizze scennettono p''a via. 
Perfino Maria Betta, fernette e fa' 'a cazetta. 
Tonino" 'o sfaticato", sbuffanne se scetaje. 
"Acchiappa chistu sbuffo" e Gaetano ll'acchiappaje. 
Accussì ncap''o 'o Vesuvio, 'o pennacchio mettette. 
"Guagliu' . Evviva Napule", 'ntusiasta dicette.
Chesta e' 'a storia 'e Napule. Ve ll'aggio cuntata.
" Stongo nu poco stanco. Ma forse aggio sunnato?”