Profilo autori

'A coppa a 'nnu balcone ca dà dinto 'o ciardino,
se sente n'addore forte 'e arance a mandarine.

Arbere spugliate e foglie e vestute 'e neve,
fanno sagli' 'na freve ca mme fa tremma'.

Tutt'attuorno 'nu paisaggio sulagne e misteriuso,
fatto 'e agrumme e rrose mme lassa 'nzeriuso.

'O sole 'mpallidito guarda e nun se posa,
'ncoppa a chella rosa ca nun se fa vasa'.

E' 'nnu ciore ca rire bello e appassiunato,
ma è filo spinato pe chi s'ô vo' arrubba'.

Mme sento 'nfreddulito e 'nnu poco sturdito.
Mme voglio pognere 'o dito, ma mme ll'aggia piglia'.

Lle vaco cchiù vvicino e cu 'nu bell'inchino,
faccio 'o figurino e provo a mm'accusta'.

Essa tutta sontuosa, bella comme 'a 'nna sposa,
'mpruvvisamente se mette a fa 'a smurfiosa.

Cu 'o bucciuolo attaccato mm'accarezza 'o core
e j' ca so' signore resto a lla guardà.

'O sape ca ll'ammiro mentre riro e suspiro.
Nun tengo ll'anemo niro d'â cogliere e stracca'.

Cu ddoje foglie pe braccia s'astregne 'nu bucciuolo:
è 'na scena d'ammore ca mme sape 'ncanta'.

'Nu suspiro lento appena appena sento.
E' essa ca ringrazia pecchè stà ancora llà.

Stà llà dinto 'o ciardino cu 'e cumpagne ruselline
e 'stu core cuntadino mme dice e ll'arracqua'.