Arricurdanneme 'e 'nu strummolo
Quanno mme frullene 'ncapa penziere tutte ammiscate: m'arricordo cose c'avevo 'e pressa 'e pressa cancellato. Ma 'a capa mia è comm'â n'osteria o 'na grossa cantina: addò ogni ricordo fermentanne, po' addeventa vino. Ce tengo astipate butteglie: vecchie, giovene e d'annata. So' tutte bbone, belle e nnisciuna è meglio 'e n'ata. Songhe vine ca me stappo pe chissà quacche occasione o pe quanno 'e ccose 'nun me vanno tanto bbone. Mò mò mme stà turnanne 'mmente 'nu penziero, c'aggio attappato, nun saccio si ogge o ll'autre jere. Putesse pare' pe cchiù 'e uno 'na cosa banale, però me piace e mme ll'arricordo tale e qquale. Steve annascuso, chino 'e scuorno, sotto a 'na spasella, 'nu pezzullo 'e spavo sfilacciato e suttile: 'na curdicella. 'Nponta teneva, ma tutta scagnata e scardata: 'na truttulella, assaje storta, brutta e scancinata. Guardannela nun saccio quanto m'aggio emozionato. - "È 'o strummolo!" - è 'o strummolo - aggio subbete penzato. Ma po' distraenneme e tenenne tanta cose 'a pensa'? mm'ô guardo, m'ô ggiro e llà 'nterra 'o vaco a pusa'. Però m'aggio arricurdato 'e cumpagnielle d'ô quartiere, quanno cu 'na pazziella tricaveme 'nfino a tarda sera. Allora tanta ricorde se so' affullate dint'â capa mia: allera, pazziariella e sempe bella chiena 'e fantasia. Picciò quanno tutto ammanca, arrapo 'e pporte 'e st'osteria e mme surzeo 'nu paro 'e ricorde strujata 'e nustalgia...
data | autore | commento (si può commentare solo se si è loggati) | |